දත්ත මැකීයාමේ සිද්ධියට එපික් සමාගමේ CEO අත්අඩංගුවට!

ජාතික ඖෂධ නියාමන අධිකාරියේ දත්ත කළමනාකරණය කළ එපික් ටෙක්නොලොජි සමාගමේ ප්‍රධාන විධායක නිලධාරියාව අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන ඇතැයි වාර්තා වේ. ඒ, ජාතික ඖෂධ නියාමන අධිකාරියේ යම් දත්ත ප්‍රමාණයක් මැකි යාමේ සිද්ධිය සම්බන්ධයෙනි.

මෙසේ අත්අඩංගුවට ගෙන ඇත්තේ තරීන්ද්‍ර කල්පගේ නැමැත්තෙක් බව වාර්තා වේ. ජාතික ඖෂධ නියාමන අධිකාරියේ දත්ත පද්ධතියේ දත්ත ගොනු කිහිපයක් මැකී ගොස් තිබුණේ ඉංජිනේරුවකුගේ අත්වැරදීමකින් බවත්, පද්ධතියට ඇතුළුවීමට අවසර ලද පසු අදාළ දත්ත යළි ප්‍රතිස්ථාපනය කළ හැකි බවත් එම අධිකාරියේ මෘදුකාංග පද්ධතිය භාර සමාගම මීට පෙර පැවසීය.

ඖෂධ නියාමනය හා සැපයුම් රාජ්‍ය අමාත්‍යවරයාත්, අධිකාරියේ සභාපතිවරයාත් ප්‍රකාශ කළේ මැකී ගිය දත්තවලට අදාළ මුල් පිටපත් සුරක්ෂිතව පවතින බවය. ජාතික ඖෂධ නියාමන අධිකාරිය යනු මෙරට ඖෂධ, වෛද්‍ය උපකරණ සහ ඔසුසැල්වලට අදාළ බලපත්‍ර නිකුත්කිරීම ආදි සියලු කටයුතු නියාමනය සිදුකරන ආයතනය වෙයි. අති සංවේදී බැවින් එම කටයුතුවලට අදාළ සියලු තොරතුරු එහි ඩිජිටල් දත්ත පද්ධතියට ඇතුළත් කොට සුරක්ෂිත කෙරේ.

එම පද්ධතියේ ඇතුළත් යම් දත්ත ප්‍රමාණයක් මැකී ගොස් ඇතැයි ඉකුත් ජූලි මසදී අනාවරණය වූ අතර එය යම් පාර්ශ්වයක කුමන්ත්‍රණයක් බවට විපක්ෂය ඇතුළු පාර්ශ්ව කිහිපයකින්ම චෝදනා එල්ල වුණි.

උපුටා ගෑනීම – www.newsi.lk වෙබ් අඩවිය

Scroll to Top