ලබන මස එළැඹෙන සිංහල හා හින්දු අලුත් අවුරුද්දට පාරිභෝගිකයන්ට අත්‍යාවශ්‍ය භාණ්ඩ මිල අඩු කෙරෙනු ඇතැයි වෙළද අමාත්‍ය නලින් ප්‍රනාන්දු මහතා පවසයි. ඉන් ආනයනකරුවන්ට අවාසියක් සිදුවුව ද එහි වාසිය මහජනතාවට ලබා දෙන ලෙස ආනයනකරුවන්ගෙන් ඉල්ලා සිටින බව ඇමැතිවරයා ප්‍රකාශ කළේය.
මේ පිළිබඳව තවදුරටත් අදහස් දැක්වූ අමාත්‍යවරයා,
“මේ අවස්ථාවේ ආනයනකරුවන්ට පාඩු තත්ත්වයක් ඇති වෙලා තියෙනවා. ව්‍යාපාරිකයින්ට එහෙම තමා. ඒ නිසා ආනයනකරුවන්ට ඉදිරියට එන්න තියෙන භාණ්ඩ සඳහා මිල අඩුකරලා ඒ සහනය ලබා දෙනවා. මිල වැඩිවෙද්දි මේ තත්ත්වය වගේම මිල අඩුවෙද්දිත් මේ තත්ත්වයට මුහුණ දෙන්න වෙනවා. නමුත් මේකෙ වාසිය අපි කියන්නේ, පාරිභෝගිකයාට දෙන්න ඕනේ කියලා. ඒ නිසා මේක ඍජුවම ආනයනය කරන්න නොදී අපට වැඩි වාසියක් පාරිභෝගිකයාට ලබාදෙන විදියට අත්‍යවශ්‍ය භාණ්ඩවල මිල අඩුවෙනවා. පහුගිය සුමානය දිහා බැලුවහම සීනි කිලෝවක් රු 25 – 30කින් වගේ අඩුවුණා. පරිප්පු අඩුවුණා. අල, ලූනු මිල පහළට ගියා. ඒ නිසා අපි හිතන්නේ උත්සව සමයේ මිල මේ සති කිහිපය තුළ අඩුවෙලා පාරිභෝගිකයින්ට අත්‍යවශ්‍ය භාණ්ඩ අඩුවට ලබා ගන්න පුළුවන් වෙයි කියලා.”